Na Netpro News – Teknolojia
Na Mwandishi wetu : Iddi Nassoro Rajabu.
Mtandao wa kijamii wa WhatsApp umeanza hatua kubwa ya kubadili mfumo wake wa utambulisho kwa watumiaji, kwa kuanzisha kipengele kipya cha “username” ambacho kitawaruhusu watumiaji kuwasiliana bila kulazimika kufichua namba zao za simu.
Hatua hii inalenga kupunguza hatari ya usambazaji holela wa namba za simu na kuongeza usalama wa faragha, hasa katika mazungumzo na watu ambao hawajulikani au katika makundi yenye idadi kubwa ya washiriki.
Usernames Kufanya Mawasiliano Kuwa Salama Zaidi
Kwa mujibu wa taarifa kutoka WhatsApp, username itakuwa kitambulisho cha kipekee ambacho mtumiaji ataweza kuchagua baada ya kuthibitisha akaunti yake kwa kutumia namba ya simu kama ilivyo kawaida.
Baada ya hapo, mawasiliano yanaweza kufanywa bila kuonesha namba ya simu, isipokuwa kwa watumiaji ambao mtumiaji atachagua kuwafichulia namba yake.
Sifa na Masharti ya Username
1. Urefu kati ya herufi 3 hadi 30
2. Kuruhusu herufi ndogo (a–z), namba (0–9), alama ya underscore (_) na dot (.)
3. Haiwezi kuanza wala kumalizika na alama ya dot
4. Lazima iwe ya kipekee na isiwe na muundo kama majina ya tovuti (mfano something.com)
WhatsApp pia inapanga kuanzisha chaguo la PIN ya tarakimu 4, ambayo itahitajika kwa mtu anayetaka kuanza mazungumzo kupitia username. Hatua hiyo inalenga kuzuia ulaghai na mawasiliano yasiyotakiwa.
Kwa Nini Kipengele Hiki Ni Muhimu?
WhatsApp inasema mpango huu unakuja wakati ambapo usalama na faragha mtandaoni imekuwa wasiwasi mkubwa kwa watumiaji wake zaidi ya bilioni mbili duniani.
Katika vikundi, biashara, au unapoongea na watu wapya, username itatoa ulinzi zaidi kwa kutoruhusu kufichuliwa moja kwa moja kwa namba yako ya simu.
Uzinduzi Rasmi
Kipengele hiki kinatarajiwa kuanza kupatikana kwa watumiaji kwa hatua, huku majaribio yakiendelea kupitia toleo la beta. Uzinduzi wa kimataifa unatarajiwa kufanyika mapema mwaka 2026.